O pasau 21 de chulio a ciudat de Zaragoza pedió parti d’o suyo patrimonio historico y parti d’a suya historia. Muitas zaragozanas yeranos ixagrinadas quan as maquinas d’a constructura Brial dentroron t’Averly y prencipioron a esboldregar as naus d’antiga fundición (una d’as fabricas de primers de sieglo millor conservadas de toda Europa) que no heban estau catalogadas como protechidas.
Han estau muitos anyos de luita dende que a constructora Brial mercó dita propiedat ta poder especular y fer pisos en un puesto que agora queda en bell meyo d’a ciudat y que en as zagueras decadas ha puyau muito de pre. Dende a ciudadanía se pediba que se catalogasen como protechius totz os edificios d’a fundición ta poder-los fer servir como equipamiento municipal y no perder a suya valura conchunta como patrimonio historico industrial. Dimpués de prebar d’aturar l’esboldregue en bellas ocasions y de proposar solucions alternativas ta que primasen os intreses publicos d’as zaragozanas y os aragoneses. Como un plan que miraba de conservar a totalidat del 100% de Averly, recullindo as alegacions d’APUDEPA, que suposaba coste 0 ta las arcas d’a ciudat y que rispetaría os dreitos d’a propiedat, trasladando a construcción de viviendas t’atro puesto. Una vegada más os intreses privaus, os diners y a especulación a ganau han baralla gracias a la complicidat de partius politicos que no tienen mica vergonya como PP, PSOE y C’s, que con a suya negativa u o suyo silencio han dixau que isto haiga tornau a pasar.
En a nuestra ciudat existen ya eixemplos como l’espalde de La Torre Nueva u o polidismo edificio d’a Universidat de Zaragoza en a Plaza d’a Madalena que amuestran como a nuestra ciudat va perdendo amónico parti d’a suya historia. No querebanos que Averly estase un caso más d’a luenga lista esferras que os habitants de Zaragoza penarán en l’esdevenidero.
As aragonesas y aragoneses somos fartas de que esclafen os nuestros dreitos, de que estricallen o nuestro patrimonio, lo espalden, lo esboldreguen o nomás lo dixen estar albandonau dica que se vaiga amortando sólo. Tenemos una milenta de eixemplos por tot o territorio de ilesias y lugars albandonaus que ya han estau minchaus por a vechetación, afogaus por entivos y oblidaus por o tiempo y as entidatz publicas. D’atra man, también existe un patrimonio inmaterial como as luengas (aragonés y catalán) que son de raso desprotechidas por as leis.
Con tot y con ixo, hemos d’estar conscients de que os partius que he citau antis son participes d’ista perdida de patrimonio porque sirven a os intreses d’os poderosos y no pas a os d’as aragonesas y aragoneses que queremos conservar a nuestra memoria e historia colectiva que ye tan rica y viva dende abe anyos. Cal veyer como os megos d’o PP fan a comedia con os biens d’a Fracha d’o Monasterio de Sigena y por atro costau refirman perdidas como la de Averly. Isto nomás contimuestra que tot responde a intreses políticos, partidistas, económicos y ta empentar ixa catalanofobia rancia que a dreita aragonesa leba anyos prebando de desembolicar en Aragón.
Ta forro y bota, en os zaguers diyas dimpués de veyer como prencipian a esboldregar naus d’a fundición, concretament as que se consideraba que teneban más valura como a chaminera, veyemos como os tribunals aceptan os argumentos de APUDEPA. Incluyido l’ature cautelar de l’esboldregue, prou que si, a cambio de depositar un millón d’euros, cosa que ye imposible ta una asociación d’ista mena. Por lo que istos afirman que a “A chustia ye feita ta favorecer a unos poquetz” y que “ye una ficción ta perpetuar os intreses d’os poderosos”.
Ye vergonyoso lo que ye pasando en iste caso de Averly, ya que conservar una chicota parti d’a factoria sin o suyo conchunto pierde de tot o sentiu. Manimenos, as zaragozanas y zaragozanos imos a continar a luita de conservar o patrimonio y biens culturals d’a nuestra ciudat sin reblar, porque tamien existen eixemplos que nos animan a continar entadebant y nos amuestran como chuntas podemos concarar os intreses económicos d’unos pocos, como o caso d’o Mercau Central en os anyos 70 en o que a ciudat se movilizó y logró salvar-lo. Defender o patrimonio ye responsabilidat de todas y totz, ya que ye un elemento clau ta comprender a nuestra sociedat a diya de hue y preservar-lo ta as cheneracions vinients. Porque como reza a famosa frase de Salvador Allende “A historia ye nuestra y la fan os pueblos”.
The post Averly, una perdida historica y una vergonya especulativa appeared first on AraInfo | Diario Libre d'Aragón.